ខណៈនាយករដ្ឋមន្ត្រីអង់គ្លេស ប្រកាសឲ្យពលរដ្ឋខ្លួនផ្អាកការជួបជុំនានា ឪពុកលោក បែរជាផ្អើនទៅជួបជុំមិត្តភ័ក្ដិនៅហាងស្រា

11

លោកនាយករដ្ឋមន្រ្តីអង់គ្លេស Boris Johnson បាននិយាយកាលពីយប់ថ្ងៃច័ន្ទថា៖“ ឥឡូវនេះដល់ពេលដែលអ្នកគ្រប់​គ្នាត្រូវបញ្ឈប់ ការ​ជួប​ជុំ​ដោយ​មិន​ចាំ​បាច់​នៅ​កន្លែង​ហាង​ស្រា ក្លិបកម្សាន្ត និង​កន្លែង​សង្គម​ផ្សេង​ទៀត​ដើម្បី​ ទប់​ស្កាត់​កុំឲ្យ​ឆ្លង​ជំងឺកូវីដ ១៩”។

ប៉ុន្តែ​អ្វី​ដែល​ធ្វើ​ឲ្យ​ភ្ញាក់​ផ្អើល​នោះ​​ឪពុក​នាយករដ្ឋមន្ត្រី​អង់គ្លេស​បែរ​ជា​ មិន​ធ្វើ​​តាម​ការ​ប្រកាស​របស់​កូន​ប្រុស​​ខ្លួន​ឡើយ​ផ្ទុយ​ទៅ​វិញ​លោក Stanley Johnson ជា​បន្តទៅ​ហាង​ស្រា​​ជួប​ជុំ​ផឹក​ស៊ី ប្រសិន​បើ​គាត់​ចង់​ទៅ ដោយ​មិន​ខ្វល់​​ពី​សេចក្ដី​ប្រកាស​រ​បស់​កូន​ប្រុស​ដែល​ជា​នាយក​រដ្ឋមន្ត្រី​ក្រោម​ប្រធានបទ “ការឃ្លាតឆ្ងាយពីសង្គម” នោះឡើយ។

ជាក់​ស្ដែង​បទសម្ភាសន៍​​ផ្សាយ​បន្ត​ផ្ទាល់​​នៅ​ប៉ុស្ដិ៍​ទូរទស្សន៍​មួយ​​​ក្រោម​ប្រធាន​បទ “វីរុស Covid-19″ កន្លង​ទៅ​​ថ្មី​នេះ​លោក Johnson ​ដែល​មាន​វ័យ​ ៧៩ ​ត្រូវ​បាន​ពិធីករ​សួរ​ថា៖” តើ​លោក នឹង​​នៅ​ឯកោ​ហើយ​ឈប់​ទៅ​ជួប​ជុំ​គ្នា​នៅ​តាម​ទីសាធារណៈ​ តាម​សេចក្ដី​ប្រកាស​របស់​រដ្ឋាភិបាល​បាន​ចេញ​កាល​ពី​ថ្ងៃ​ច័ន្ទ ទី១៦  ខែមីនា ដែរ​ឬ​ទេ?”។​

ភ្លាម​ៗ​នោះ​លោក Johnson បានឆ្លើយតបថា៖ “​ពិត​ណាស់​ ប្រសិនបើខ្ញុំត្រូវទៅហាងស្រា ខ្ញុំប្រាកដជាទៅហាងស្រាមួយ ប្រសិនបើខ្ញុំត្រូវការទៅហាងស្រានោះ” ។